Katër shqiptarë janë arrestuar pasi një person vdiq dhe 6 të tjerë u plagosën gjatë një shpërthimi dhune në Bristol, Angli. Kujtojmë se ngjarja ka ndodhur në datën 24 maj në zonën e Brislington.
Lidhur me ngjarjen bëhen me dije se katër shqiptarët e arrestuar janë Sadik Lleshi, 34 vjeç, Brikel Palaj, 32 vjeç, Kastriot Mhillaj, 34 vjeç dhe Rinush Behari, 32 vjeç.
Viktima i paidentifikuar u qëllua me thikë dhe ndërroi jetë gjatë rrugës për në spital. Besohet se personi që vdiq është rreth të 30-tave.
Nga ana tjetër, katër të pandehurit u lanë në paraburgim dhe më pas do të paraqiten në Gjykatën e Kurorës së Bristol më 27 qershor.
Në kuadër të hetimit, të udhëhequr nga ekipi i hetimit të krimeve të mëdha të policisë së Avon dhe Somerset, dy burra të tjerë, të moshës 18 dhe 34 vjeç, u arrestuan me dyshimin se kishin ndihmuar në fshehjen e ngjarjes.
Një person tjetër i arrestuar në lidhje me këtë hetim ndodhet në spital për trajtim. Po ashtu zyrtarët kanë sekuestruar gjithsej gjashtë automjete për ekspertizë mjeko-ligjore.
