Një vatër e re koronavirusi është zbuluar së fundmi te spitali “Shefqet Ndroqi”, teksa ky i fundit iu rikthye normalitetit, pasi prej javësh funksionoi si spital Covid. Bëhet fjalë për tre pacientë që kanë rezultuar pozitivë, ndërsa një prej tyre ka humbur jetën.
Abcnews.al mëson se një rast është një 80-vjeçare, e cila fillimisht ka qenë e shtruar në pavionin e Sëmundjeve të Brendshme në QSUT. Nga Sëmundjet e Brendshme ajo ka shkuar në shtëpi. Ndërkohë pas 7 ditësh në shtëpi e moshuara ka shfaqur komplikacione në mushkëri dhe është dërguar në Sanatorium, teksa ky i fundit u hap, dhe nuk është më spital Covid.
80-vjeçarja ka ndërruar jetë të enjten. Teksa ishte e shtruar në Sanatorium të moshuarës i është marrë tamponi, ndërsa përgjigja ka dalë pozitive pas vdekjes. Pra e moshuara është konfirmuar e infektuar nga virusi pasi kishte ndërruar jetë. Mësohet se mjekja që e ka marrë trajtim ka dyshuar që në fillim dhe e ka izoluar të moshurën, duke shmangur kështu kontaktet e saj me pacientë të tjerë.
Ndërkohë, rasti tjetër në Sanatorium është një pacient nga Librazhdi. Pasi i është bërë tamponi dhe ka dalë pozitiv, ai është transportuar te Infektivi. Po ashtu burime për abcews.al bëjnë të ditur se edhe një tjetë pacient te “Shefqet Ndroqi” ka rezultuar pozitiv me Covid-19.
Kujtojmë se ditën e sotme ISHP konfirmoi 23 raste të reja me koronavirus gjatë 24 orëve të fundit në vend./abcnews.al
