Paraditen e sotme ka mbërritur në Kuvend kërkesa e deputetit Alqi Bllako për dorëheqje nga mandati i deputetit. Ndërkohë në orën 18:00 është njoftuar mbledhja e Këshillit të Rregullores, Mandateve dhe Imuniteteve për të shqyrtuar kërkesën e SPAK dhe për të hequr imunitetin e deputetit Alqi Bllakos.
Bllako gjithashtu reagoi ditën e djeshme pas kërkesës së SPAK për arrestimin e tij si i dyshuar për aferën e inceneratorit të Fierit. Me anë të një postimi në rrjetet sociale, ai shkruajti se do hiqte vetë dorë nga mandati i deputetit për t’u përballur me drejtësinë.
“Prandaj kam vendosur që ditën e nesërme t’i paraqes Kryetares së Kuvendit dorëzimin e mandatit tim si deputet i Republikës së Shqipërisë, dhe të përballem me akuzën pa asnjë privilegj. Si një qytetar i zakonshëm, si prind dhe familjar i përgjegjshëm; dhe mbi të gjitha si një shërbëtor publik, që padyshim e kupton se çdo angazhim vjen edhe me çmimin e përbaltjes politike apo edhe me detyrimin e sqarimit të së vërtetës para drejtësisë!” – shkruan Alqi Bllako.
