Në 25 qershor shqiptarët duhet të vendosin me votë për atë që do të marrë timonin e Qeverisë.
Kështu ka deklaruar kryeministri Edi Rama, në emisionin “Zonë e Lirë”, i cili i ka qëndruar idesë se nuk do të ketë më koalicione bazuar në ndarjen e tepsisë.
Megjithatë në emisionin ku Rama mungonte prej 7 vitesh, mori atë që me ngulm po u kërkon shqiptarëve: timonin.
Çani i ka dhuruar një timon makine kryeministrit e cili e mbajti gjithë kohën para duarve dhe e përdori për të konkretizuar bisedat që bënte.
Rama theksoi se nëse shqiptarët do i japin timonin, atëherë partitë e tjera mund të marrin pjesë në koalicione vetëm mbi bazë të përputhjeve programore, jo që të ndajnë tepsinë.
“Nëse nuk na japin tepsinë, do të nisë historia nga e para. Do të vijnë dhe do të kërkojnë drejtoritë. Unë do i them jo, do shkojnë tek tjetri, do i thonë sa na jep ti. I jemi lutur deputetëve aman hajde voto, dhe na thonin na jep drejtorin atje, ndryshe stë japim votën.
Kjo çështja e timonit është kështu, unë jam timonieri, ti je pasagjeri. Gazin dhe frenat i kam unë, pasagjeri është një pilot rezervë. Mendojeni administratën si një makinë. Këtu vijnë dhe të thonë unë dua serbatorin, një tjetër të thotë dua dy sedilje”, tha Rama.
Ndër të tjera Rama ka rrëfyer dy bisedat me Presidentin e SHBA, Donald Trump gjatë samitit të NATO-s.
Rama tha se Trump pati një reagim pozitiv kur dëgjoi emrin e Shqipërisë.
“Presidentin Trump e takova në Bruksel. Na prezantoi Sekretari i NATO-s. Ai reagoi pozitivisht kur dëgjoi “Albania”, “Aaa Albania”, tha.
2 herë folëm, njëherë në fillim dhe pastaj në hollin e godinës. Folëm për Shqipërinë, folëm për rajonin. Folëm si shkonin gjërat.
Kur dolëm i thashë, a e di kush e ka ndërtuar këtë godinën e NATOS?: Ai që ka bërë Trump Tower në Chikago. Dhe ai shprehi habinë, se nuk e dinte. Pastaj u afruan të tjerë dhe vijoi biseda”, tha Rama.
