Lajmi që ka entuziazmuar të gjithë ata që ndjejnë për skuadrën e kuqe, por edhe njerëzit e futbollit në përgjithësi, ka të bëjë me një vendim të qeverisë, për t’i dhënë në përdorim Partizanit një sipërfaqe prej 37 mijë metra katrorë, për të rindërtuar kompleksin e vet. Klubi i kuq, një nga më të titulluarit në vend, e kishte një të tillë, por që pas polemikash iu kthye pronarëve, të cilët ndërtuan një lagje të tërë me pallate. Ndërsa sot, lajmi tjetër është se sa do t’i kushtojë klubit kjo sipërmarrje gjigande. Fillimisht flitej për 2 milionë euro investim, ku do të përfshiheshin fushat për stërvitje, si dhe një hotel me të gjithë aksesorët, për akomodimin e skuadrës. Në atë kohë ishte në fuqi edhe një premtim i FSHF-së, për sponsorizimin e ndërtimit të dy fushave, një me bar natyral dhe një sintetik. Ndërsa tani në projekt është përfshirë edhe një stadium me kapacitet 4 mijë vende, gjë që parashikon rritje të ndjeshme të shifrave në faturë. Por ata e kanë seriozisht, për të ndërtuar nga zero të parin klub privat në Shqipëri.
