UEFA konfirmon se Partizani ka regjistruar mesfushorin Luka Bertoni, i cili mund të jetë i gatshëm që për ndeshjen e parë në “Elbasan Arena” ndaj Salzburg, kampionëve të Austrisë
Nëpërmjet një publikimi në faqen zyrtare, UEFA ka konfirmuar se Partizani ka regjistruar një tjetër futbollist për ndeshjet e turit të tretë paraleminator të Champions League dhe ai është Luka Bertoni. Në fakt mesfushori Italian ka qenë bashkë me skuadrës që në Budapest, por takimin ndaj Ferencvarosh e ndoqi nga tribuna. Fantazisti pritet të jetë një goditje e mirë për skuadrën e Sormanit, pasi pikërisht në atë pozicion mungon një futbollist cilësor. Bertoni është 24 vjeç dhe ka dalë nga akademia e Milanit, ndërsa Partizani e huazoi nga FC Sudtirol, skuadër e Lega Pro A, ku në sezonin e kaluar u aktivizua në 30 takime (28 prej të cilave si titullar) dhe ka shënuar 1 gol. Futbollisti që do të mbajë numrin 70 është afrimi i fundit në skuadrën e kuqe gjatë merkatos së verës, pas sulmuesve Kaleb Ekuban (mbërritur po nga Lega Pro A, ku sezonin e fundit është aktivizuar me Renate Ioan dhe në 17 ndeshje të luajtura ka shënuar 8 gola) dhe sllovenin Dalibor Volas, nga të cilët pritet shumë që në ndeshjen e rradhës ndaj Salzburg.
