48 parti të vogla kanë dorëzuar sot në Kuvendin e Shqipërisë një “listë” propozimesh për disa ndryshime në kodin zgjedhor.
Kreu i Lëvizjes për Zhivillim Kombëtar, Dashamir Shehi në një konferencë për shtyp citoi disa nga ndryshimet e propozuara.
Dashamir Shehi:
Ne jemi një grup partish që nuk jemi të përfaqësuar në komisionin bipartizan. Ne jemi edhe zëri i partive të tjera që nuk janë në Kuvend. Komisioni u bë kohë që nuk po funksion dhe shpresoj të jetë një shtysë. 90% e propozimeve janë ato që ka propozuar opozita. Ne ndryshojmë nga propozimet e Partisë Demokratike në dy elementë, këtu procesi do të administrohet nga sistemi i drejtësisë, jo më me numërues me teser partie në qafë. Kjo nuk ka funksionuar.
Thelbi i propozimit është çështja e numërimit. Votim dhe numërim elektronik. Ditën që kjo do të arrihet, i bie valenca numëruesve. Një propozim tjetër është për emigrantët. Edhe listat e hapura, që do të thotë se gjysma e pushtetit të kryetarit të partisë bie poshtë dhe hierarkinë ta bëjnë qytetarët.
Përtej kësaj, propozimi jonë është bërë nën nxitje për të stimuluar ata që drejtojnë t’u japin një drejtim këtyre punëve. Ka ardhur dita që zgjedhjet të jenë të lira dhe të ndershme. Institucioni i zgjedhjeve të rifitojë besimin popullor.
