Partia Demokratike ka denoncuar një skandal sipas tyre me punësimin për qëllime elektorale në qytetin e Fierit.
Në një status në Facebook, Albana Vokshi shkruan se mësuesit e marrë në punë për zgjedhje në shkollat e Fierit nuk kanë marrë rrogat e tyre.
Vokshi i quan këto punësime të përkohshme elektorale në këmbim të votës, duke shtuar se ky skandal elektoral dhe nëpërkëmbje e dinjitetit njerëzor ka ndodhur në, të paktën, 2 gjimnaze të Fierit, në shkollën e muzikës “Jakov Xoxa” dhe në shkollat e mesme të bashkuara në Kafaraj, Povelçë e Cakran të Fierit.
Në fund të reagimit të saj, Albana Vokshi thekon se nisja e këtij mandati të paligjshëm me mashtrim, keqtrajtim, dhe braktisje për mësuesit tregon sesa e drejtë dhe e pazëvendësueshme është beteja e tyre për ndryshimin dhe zgjedhjet e lira e të ndershme.
Postimi i Albana Vokshit:
Provat për vjedhjen e zgjedhjeve duke përdorur burimet shtetërore janë kudo.
Duhet që 3 prej anëtarëve të KAS të mos i binden më Ramës, por ligjit dhe masakra elektorale do të provohet edhe zyrtarisht. Një nga provat për të cilat KAS duhet të marrë informacion janë punësimet elektorale.
Mësuesit e marrë në punë për zgjedhje ne shkollat e Fierit kanë mbetur pa rroga. Ata nuk ishin parashikuar në buxhet dhe sot nuk paguhen dot, sepse janë jashtë organikës. Janë vetëm punësime të përkohshme elektorale në këmbim të votës. Ky skandal elektoral dhe nëpërkëmbje e dinjitetit njerëzor ka ndodhur në, të paktën, 2 gjimnaze të Fierit, në shkollën e muzikës “Jakov Xoxa” dhe në shkollat e mesme të bashkuara në Kafaraj, Povelçë e Cakran të Fierit.
Këtë muaj mësuesit “elektoralë” do të mbeten pa rroga, pasi u është thënë se fondi limit mujor është tejkaluar.
Nisja e këtij mandati të paligjshëm me mashtrim, keqtrajtim, dhe braktisje për mësuesit na tregon sesa e drejtë dhe e pazëvendësueshme është beteja jonë për ndryshimin dhe zgjedhjet e lira e të ndershme.
