Ashtu siç ishte parashikuar ditën e sotme në orën 10:00 do të zhvillohet seanca e parë plenare me deputetët e rinj të zgjedhur në zgjedhjet e 25 prillit.
Pas 30 muajsh mungesë sot do të rikthehen në Kuvend deputetët e zgjedhur të opozitës.
Deputetët do të hyjnë nën masat anti-covid, të zgjedhurit në 25 prill do të thonë “betohem”, pasi Luljeta Bozo të lexojë formulën e betimit dhe t’ju thërrasë emrat.
Kujtojmë se kryetari i Partisë Demokratike, Lulzim basha ka përjashtuar nga grupi liderin historik të demokratëve Sali Berisha, i cili është shpallur “non grata” nga SHBA-të.
Ndërkohë pritet që seanca ti ndërpresë punimet gjatë drekës për ti rinisur në orën 5 pasdite, ku do të votohet kryetarja e re, si dhe Lindita Nikolla do të ftohet të mbajë fjalën e saj.
Gjithashtu në seancën e parë nuk do të jenë 140 deputetë pasi disa prej tyre kanë lënë mandatin e deputetit, mes të cilëve është dhe Tom Doshi që fitoi mandat në dy qarqe. Deputetët e tjerë të zgjedhur që kanë dorëzuar mandatin pa nisur kuvendi Mark Marku, Najada Como, Gramoz Ruci dhe Lefter Koka, pasuesit e të cilëve do të mandatohen nga KQZ javën e ardhshme.
