Policia bashkiake shoqëron aktivistë, lëndohet lehtë një polic
Rreth 100 aktivistë të shoqërisë civile kanë dalë sërish pranë Parkut të Liqenit Artificial në kryeqytet për të kundërshtuar projektin e Bashkisë për ndërtimin e një këndi lojërash. Ata paralajmëruan se do të vendosin çadra, duke theksuar se do të qëndrojnë gjatë gjithë ditës atje. Tentativa për të vendosur çadrat ka shkaktuar përplasje midis tyre dhe policisë. Policia, duke e cilësuar të paligjshme, nuk ka lejuar futjen e çadrave brenda gardhit rrethues, ndaj edhe në këtë moment ka ndodhur përplasja.
Disa prej aktivistëve janë shoqëruar në komisariat, ndërsa është lënduar një punonjës i policisë bashkiake. Aktivistët paralajmëruan se nuk do të lejojnë ndërtimin e këndit të lojërave, duke shtuar se nuk ishin vandalë. Ata kanë deklaruar se do të qëndrojnë gjatë gjithë ditës në parkun e liqenit.
