Bogdani: Projekti është tradhti ndaj qytetarëve
Duke e quajtur projektin e Bashkisë së Tiranës për parkun e lojrave te Liqeni, një shkelje të gjithanshme të ligjeve dhe tradhëti ndaj qytetarëve, PD ka bërë thirrje për protesta kundër kryebashkiakut Erion Veliaj. Deputeti Gerti Bogdani i ka ftuar qytetarët që duke nisur nga sot në ora 11.00 të bashkohen në protestën për të mbrojtur “mushkërinë e kryeqytetit”. Duke iu kundërvënë projektit të bashkisë, Bogdani ka deklaruar se Veliaj: “Nuk ka bërë asnjë konsultim publik, ashtu siç e parashikon ligji; Nuk ka një projekt përfundimtar, por një projekt që ndryshon sipas rastit, kundër çdo parimi ligjor; Nuk ka leje mjedisore e as studim mjedisor; Gënjeu kur tha që nuk do të pritet asnjë pemë, sepse pemët u prenë; Gënjeu kur tha nuk do të ketë beton sepse 31 betoniera janë derdhur deri tani mu në zemër të parkut; Gënjeu për lokalin, sepse lokali ishte tenderuar dhe ishte i publikuar në faqen publike të tenderave”.Pikërisht për këtë deputeti democrat I ka ftuar qytetarët e Tiranës në protesta. “I bëjmë thirrje të përsëritur prokurorisë të veprojë për denoncimet e njëpasnjëshme që janë bërë për këtë çështje nga PD dhe nga qytetarët. I bëjmë thirrje çdo institucioni përgjegjës që të mos bëhet palë në këtë mashtrim antiligjor dhe shkelje flagrante ligji nga të gjitha anët! Rezistenca dhe beteja e qytetarëve të Tiranës për parkun e tyre do të jetë edhe më e fortë dhe më e vendosur. Duke nisur sot, pas pak orësh, në orën 11:00, ku do të bashkohemi për të mbrojtur mushkërinë e qytetit, për të mbrojtur pasurinë e qytetarëve. I bëjmë thirrje çdo qytetari të Tiranës të bashkohet në luftën ndaj kësaj padrejtësie, për fëmijët tanë, për veten tonë, për të ardhmen tonë!”, ka deklaruar Bogdani.
