Ministria e Shëndetësisë ka marrë monopolin e çdo informacioni mbi të prekurit nga Covid 19.
Ajo e përditëson situatën e të prekurve nga virusi çdo 24 orë, jep vetëm informacionin që do, në deklarata që i regjistron vetë dhe i shpërndan.
Gazetarët nuk kanë mundësi të pyesin autoritetet mbi profilet e pacientëve, apo mbi numrin e testimeve të kryera që bën Instituti i Shëndetit publik në raport me telefonat që vijnë në urgjencë me kodin Covid 19.
Askush nuk pyet dot mbi numrin e respiratorëve, shtretërve në spitale apo mbi tenderët që kryen Ministria e Shëndetësisë në funksion të përballimit të pandemisë.
Në këtë situatë, më e pakta që pritet prej institucioneve shëndetësore, është saktësia në ato pak informacione që jepen me pikatore e kursim.
Por nuk ndodhi kështu. Mëngjesin e kësaj të hënë, pasi kishte raportuar dy vdekje radhazi nga Covid 19, Ministria e Shëndetësisë njoftoi median në orën 09:53, se një pacient 61 vjeçar kishte humbur jetën.
Pas 83 minutash, kur lajmi për viktimën e 5-të të Coronës kishte marrë dhenë, ministria e korrigjoi njoftimin në orën 11:15, duke mos kërkuar as ndjesë së paku familjarëve.
Për të bindur se gabimi nuk ishte shpejtësie, por një paqartësi profesionale, u shpërnda kjo deklaratë e mjekut Pellumb Pipero.
“Njëri nga rastet sot në mëngjes ka bërë vdekje klinike, vdekje që zgjati relativisht gjatë, por pa e humbur shpresën për ta rikthyer në jetë. Fatmirësisht u rikthye në jetë, por vazhdon të jetë ende rëndë”./ abcnews
