Ministri i Bujqësisë, Zhvillimit Rural dhe Administrimit të Ujërave , Edmond Panariti zhvilloi një takim me deputeten e Bundestagut gjerman, Kordula Kovac, përfaqësuese e Partisë Kristian Demokrate që ishte e shoqëruar nga Prof. Dr. Monika Christmann, Kryetare e Organizatës Ndërkombëtare të Vreshtarisë dhe Verës dhe Prof. Dr. Manfred Großmann.
Në fokus të takimit ishte situata e vreshtarisë shqiptare dhe perspektiva e eksportit të verave të prodhuara në vend, drejt tregjeve europiane. Ministri Panariti pas prezantimit të disa varieteteve të verërave si Kalmeti, Merloti, Kabërneja, Tokai dhe Riesling theksoi se vera shqiptare e ka një përgjigje lokale autoktone për secilën nga këto emra të njohur ndërkombëtar.
Panariti u ndal edhe në një nga arsyet që mbajnë pezull të ardhmen e këtij sektori, çështja e pronës dhe fragmentarizimi i tokës ndaj dhe kërkoi mbështetjen dhe asistencën teknike në procesin e certifikimit të verave shqiptare.
Deputetja Kovac siguroi ministrin Panariti për mbëshetje në procesin e autentifikimit të disa varieteteve të verave shqiptare dhe për pranimin e tyre në tregun gjerman dhe më gjerë, duke parë potencialin në rritje dhe zhvillimin e sektorit të vreshtarisë dhe prodhimit të verave.
