Këshilltari i presidentit Meta, Edmond Panariti, është në të njëjtën linjë me protestuesit, që qeveria duhet të reduktojë TVSH-në për ushqimet në këtë kohë krize që ndodhemi. Gjatë një interviste televizive ditën e sotme ai i ka bërë thirrje qeverisë të marrë masa urgjente për përballimin e rritjes së çmimeve për familjet shqiptare.
Panariti tha se Shqipëria ka TVSH-në më të lartë në rajon dhe Europë me 20%, ndërkohë që vendet fqinje e kanë ulur në 6-7%, prej krizës së çmimeve. “Qeveria ka dy instrumente në dorë, në radhë të parë lehtësirat fiskale. Ju e dini që produktet e shportës ngarkohen me TVSH, jo vetëm më e larta në rajon dhe Europë, por ndër më të lartat në botë. Lehtësimi nga kjo barrë fiskale. Ta çojmë TVSH për produktet bazë në nivele të rajonit që janë 6-7%. Shumë vende kanë marrë vendimin për ta pezulluar përkohësisht ngarkimin me TVSH për produktet e shportës”, u shpreh ai.
Gjithashtu, Panariti propozoi shpërndarjen nga qeveria të kuponëve ushqimorë për familjet e varfra dhe pensionistët.
