Në se vërtetohen akuzat e Këshillit të lartë të Drejtësisë ndaj Ministrit të Brendshëm, Saimir Tahiri, atëherë ky i fundit rrezikon të dënohet me gjobë ose burg deri në tre vjet. Ministri u padit nga KLD në prokurori pasi sulmoi gjyqtarin Arjan Aliaj, pasi ky i fundit dha vendimin për pezullimin nga detyra të Drejtorin e Përgjithshëm të Policisë së Shtetit, Hako Çako. Vendimi u dha me kërkesë të prokurorisë që po heton skandalin e përgjimeve.
Ministri e sulmoi personalisht dhe nëpërmjet disa mediave pranë qeverisë gjyqtarin Aliaj. Ai e quajti atë një gjyqtar që ka liruar kriminelë, ndërsa në mediat pranë qeverisë u infiltruan informacione në lidhje me një hetim që policia kishte nisur kryesisht për pasurinë e gjyqtarit. Pasuria kishte të bënte me mënyrën se si e kishte blerë një shtëpi gjyqtari. KLD vlerësoi se në akuzat publike, Tahiri kishte shkelur disa ligje. Gazeta Shqiptare ka zbardhur sot padinë e KLD-së ndaj Tahiorit ku evidentohen shkeljet që supozohet se ka bërë Tahiri. Në padinë e KLD-0së, thuhet se ai ka shkelur nenin 317 të kodit të procedurës penale, nenin 278, pika 2 të kodit të procedurës penale, nenin 7, pika 108/2014 për Policinë e Shtetit dhe nenin 281, pika 4 të procedurës penale, duke sjellë pasoja në ushtrimin e detyrës së gjyqtarit të Gjykatës së Shkallës së Parë Arian Aliaj.
KLD nënvizon se qëllimi i deklaratave të Ministrit ishte vetëm intimidimi, frikësimi dhe kanosja e gjyqtarit. Sipas KLD, Tahiri ka tejkaluar në mënyrë të paligjshme rolin institucional.
KLD thekson në padi se Saimir Tahiri ka vepruar për llogari personale. Ministri po hetohet edhe vetë për pajisjen e përgjimit, ndonëse ndaj tij nuk janë ngritur zyrtarisht akuza.
