Sekretari amerikan i Shtetit, John Kerry, tha se bisedimet me Rusinë dhe partnerët e koalicionit kundër Shtetit Islamik “po i afrohen një marrëveshjeje mirëkuptimi”, për të rivendosur një armëpushim në Siri, përfshirë zonat përreth Aleppos.
“Ka pasur shumë bisedime gjatë ditës së djeshme, po ashtu edhe sot, dhe po i afrohemi një mirëkuptimi. Por, ende ka punë për të bërë, e për këtë arsye jemi këtu”, ka thënë Kerry sot në Gjenevë.
Ai i bëri këto komente në fillim të takimit me ministrin e Jashtëm të Arabisë Saudite, Adel al-Jubeir, në Gjenevë.
Jubeir nga ana tjetër, dënoi luftimet e ashpra në dhe përreth Aleppos, dhe i cilësoi si “shkelje të së drejtës ndërkombëtare humanitare.”
Ai fajësoi sulmet ajrore që kanë vrarë qindra njerëz gjatë javës së kaluar, nga forcat e presidentit sirian, Bashar al-Assad.
Rusia tha gjatë fundjavës se nuk do të kërkojë nga forcat e Assadit që t’i ndalin sulmet ajrore në Aleppo.
Moska pretendon se ato sulme kanë në shënjestër militantët e Shtetit Islamik, të cilët nuk janë të përfshirë në armëpushimin e ndërmjetësuar nga ndërkombëtarët.
