OFL i ka dërguar formularin për deklarimin e pasurisë katër personave të dënuar për krime të ndryshme në Tiranë.
Mësohet se ata janë Mino Zotaj, i dënuar për veprën penale “Vjedhja me dhunë, e kryer në bashkëpunim”; Luan Ibro, i dënuar për kryerjen e veprës penale “Vjedhja me dhunë”; Flamur Xeka, i dënuar për kryerjen e veprës penale “Trafikimi i narkotikëve”; dhe Gjon Kola, i dënuar për kryerjen e veprës penale “Trafikimi i narkotikëve”
Njoftimi i plotë
Në zbatim të detyrave të përcaktuara në Aktin Normativ të datës 31 janar 2020, vijon pa ndërprerë Operacioni Forca e Ligjit.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
M. Z., banues në Tiranë, i dënuar për veprën penale “Vjedhja me dhunë, e kryer në bashkëpunim”;
L. I., banues në Tiranë, i dënuar për kryerjen e veprës penale “Vjedhja me dhunë”;
F. X., banues në Kurbin, i dënuar për kryerjen e veprës penale “Trafikimi i narkotikëve”;
Gj. K., banues në Lezhë, i dënuar për kryerjen e veprës penale “Trafikimi i narkotikëve”;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
