Oficerë gjyqësorë kanë sekuestruar dosjet e Komisionit Qëndror të Zgjedhjeve, për të vërtetuar nëse është respektuar ligji për ndryshimin e deklaratave.
Prokuroria e Përgjithshme ka konstatuar se në disa raste, ky institucion nuk ka përmbushur detyrimet e tij në bazë të ligjit “Për Dekriminalizimin”.
Prokuroria ka kërkuar që t’i ndërpritet mandati deputetit Armando Prenga, si dhe të nisë hetim penal për shkeljet ligjore të kryera nga ana e Komisionit Qendror të Zgjedhjeve, pasi Prenga rezulton se nuk ka deklaruar një dënim nga Gjykata e Kurbinit.
Prokuroria e Përgjithshme ka konstatuar se subjektit Armando Prenga i duhet ndërprerë mandati i deputetit, pasi nuk ka deklaruar:
1.Një dënim të formës së prerë, dhënë nga Gjykata e Rrethit Gjyqësor Kurbin, për veprën penale të “Falsifikimit të dokumenteve”, me 450 000 lekë gjobë
2.Si edhe faktin që rezulton me precedentë penale në shtetin italian për vjedhje pasurish, falsifikime në përgjithësi, marrje të pasurisë së vjedhur, deklarata për identitet të rremë në vitet 1996-1997 në qytetin e Milanos. Këto të dhëna janë konfirmuar nga komunikimi zyrtar me autoritetet italiane.
