Viti i ri shkollor ka nisur mes problemesh, për nxënësit e shkollave në zonat e thella malore të Kukësit.
Në fshatin Orgjost, të Njësisë Administrative Zapod, nxënësit e shkollës 9-vjeçare, “Hamdi Pelivani” për të shkuar në shkollë duhet të kalojnë në një urë me dërrasa të cilat në disa pjesë mungojnë ose janë të dëmtuara.
Fëmijët shpesh herë nuk shkojnë në shkollë sidomos gjatë kohëve me reshje shiu e dëbore kur edhe përroi që lidh dy fshatra fryhet nga prurjet e shumta.
Banorët thonë se, ia kanë paraqitur të gjitha institucioneve, por deri tani askush nuk ka ndërhyrë për riparimin e saj.
Edhe drejtusit e shkollës e konsiderojnë si një problem shumë akut, por askush nuk i ka ndihmuar nxënësit, ndonëse ata nuk e frekuentojnë shkollën, nga frika e rrëmbimit të tyre nga rrjedha e përroit. Ata duhet të përshkojnë në këmbë dhjetra kilometra rrugë, pasi vijnë nga dy fshatra të ndryshëm, në të vetmen shkollë që ka zona.
Sikur të mos mjaftojë rruga që përshkojnë, shkolla ku mësojnë këta nxënës ka mungesa të theksuara në bazën materiale.
Një pjesë e mirë e nxënësve detyrohen të qëndrojnë në këmbë pasi nuk ka karrige dhe banka. Madje, edhe mësuesit në këshillin pedagogjik, nuk kanë karrige për t’u ulur.
/Shqiptarja.com/
