Ish-kryeministri Sali Berisha ka folur për mediat pas daljes nga mbledhja e grupit parlamentar të PD në selinë blu. Berisha u shpreh se Enkelejd Alibeaj pushoi së qeni kryetar i Grupit Parlamentar të PD në momentin kur sipas tij paditi partinë në gjykatë për llogari të qeverisë. Ai gjithashtu tha se Alibeaj nuk ka më asnjë funksion në PD.
“Për të qenë i hapur me ju si një njeri që isha shprehur për Enkelejd Alibeajn ndonëse me probleme të vërteta qenia e tij si kryetar grupi, por me një marsh tolerance të padiskutueshme, me veprimin e tij ai pushon së qenuri kryetar i grupit parlamentar. Është veprim shumë i gabuar, i shërben qeverisë. Ai nuk ka asnjë funksion të tillë. Ika, ika se kam takime” – tha Berisha.
Berisha tha më tej se padia e Alibeajt nuk ka asnjë bazë dhe se atë nuk e konsideron si kryetar të komanduar në PD.
“Padia nuk ka asnjë bazë. Është të mos pranosh një proces që sot nuk e kundërshton asnjë shqiptar. Nuk ka asnjë tagër sepse ai e konsideron veten kryetar të PD në një kohë kur ai nuk ka asnjë funksion të tillë” – tha Berisha.
