Aksidentohet një autobus me studentë, i cili po kthehej nga Saranda.
Ngjarja është regjistruar rreth orës 16:30 të pasdites së sotme në aksin rrugor Sarandë-Gjirokastër, në vendin e quajtur Qafa e Muzinës.
Autobusi në të cilin udhëtonin studentë të një Universiteti në Tiranë është përplasur me një automjet.
Si pasojë e përplasjes, 7 persona të cilët udhëtonin në mjet kanë mbetur të plagosur, mes tyre një fëmijë 5 vjeç, i cili mësohet se ka marrë plagë në kokë.
Të lënduar lehtë kanë mbetur edhe disa prej studentëve në autobus. Policia dhe një autoambulancë kanë mbërritur në vendngjarje.
Sakaq nga aksidenti janë krijuar radhë të gjata në dy anët e rrugës deri në 1 km.
