Kryetari i Partisë Demokratike, gjatë mbledhjes së grupit parlamentar, pas sulmeve ndaj kryeministrit Edi Rama, duke e cilësuar si një person pa atdhe dhe dinjitet, “shpërtheu” edhe ndaj ambasadores amerikane Yuri Kim, për të cilën tha se është një McGonigal me fustan, që hkelmoi kushtetutën e SHBA dhe Shqipërisë
“Tre persona kanë heshtur deri sot. Ky është Edi Rama, siç e dini bëri vetëm sqarimin, se pasi u përpoq ta injoronte, filloi të flasë për kazan e Big Brother, sqarimi i vetëm se e kam mik dhe do e kem pavarësisht se çfarë bën drejtësia amerikane. Në kod ishte mos fol se do flas.
Nuk foli Lulzim Basha dhe kur foli përsëri me kod. Nuk përmendi dot as emrin e Edi Ramës dhe as të McGonigal. Shikoni çfarë luhet në kurriz të qytetarëve.
Nuk foli as guvernatorja Yuri Kim, e cila në raport me opozitën është një McGonigal me fustan. E di që do e transmetojë si një qëndrim amerikan. Absolutisht, kam një besim të palëkundur te ai vend që vërtetë ka McGonigal, por po e arreston, vend të dytë si ai nuk ka. U soll si McGonigal me fustan pasi kam bindjen se ajo shkelmoi kushtetutën e vendit të saj dhe timin, konventën e Vjenës dhe këto s’mund të jenë orientime të Amerikës, të vlerave, të ligjeve, të SHBA që udhëheqin me moralin dhe frymën e tyre”, tha Berisha.
