Një ditë pas votimit të ligjit për hapjen e Dosjeve, i cili kaloi në Kuvend me 94 vota ku 20 prej tyre ishin të deputetëve të PD që mbështesin grupin e Alibeajt, Partia Socialiste ka dorëzuar sot dy amendamentet për ish-bashkëpunëtorët e Sigurimit të Shtetit.
Kreu i Grupit Parlamentar të Partisë Socialiste, Taulant Balla deklaroi se PS do prezantojë dy nisma të reja në ligjin për partitë politike dhe ligji për ndryshimet në dekriminalizim, të cilat pritet të futen në procesin e diskutimit.
“Të mos kenë mundësi të jenë pjesë e vendimarrjes në çfarëdo niveli qoftë ai. PS do prezantojë dy nisma të reja: në ligjin për partitë politike dhe ligji për ndryshimet në dekriminalizim. I depozitojmë sot, do jetë konferenca ajo e cila do t’i fusë në procesin e diskutimit. Thirrja ime për kolegë të opozitës, duhet një shumicë të cilësuar. Shpresoj që të gjitha përbetimet e djeshme, të Alibeajt se janë të gatshëm të bashkëpunojnë, që personat të mos jenë më pjesë e politikës. Dje u konfirmua se në 30 vite Berisha i ka gënjyer ish të përndjekurit. Fakti që Berisha nuk u paraqit në Kuvend për të votuar hapjen e dosjeve të ish sigurimit të shtetit, është ndëshkimi më ekzemplar, përmbyllja më kuptimplotë e një komunisti, të shndërruar në antikomunist. Ne po merremi me pjesën që ka të bëjë me ish sigurimin e shtetit”, tha Balla.
