Një ditë përpara protestës së paralajmëruar nga opozita, kryetarja e LSI-së, Monika Kryemadhi tha se nuk ka të bëjë vetëm me protestën politike por për protestën ekonomike të qytetarëve.
Kryemadhi deklaroi se shteti shqiptar sot është i kapur, dhe kapja e tij sipas saj, ka pasuruar pesë veta dhe ka varfëruar më shumë shqiptarët.
“Protesta e nesërme është vazhdimësi e protestave jo të opozitës por të shqiptarëve. Ka ardhur koha që politikanët të japin llogari para popullit dhe ta kenë frikë popullin. Iligjitimiteti i parlamentit është bërë për ne më shumë se normale. Nëse deputetetët hyjnë në parlament me subvencion me paratë e fermerëve zoti e ruajtë Edi Ramën. Nëse këta deputetë kanë hyrë në mënyrë kontrabandë por që do të mundësojnë uljen e çmimeve, të kadastrave, të energjisë etj, do të ishte një mrekulli. Por sot kemi rritje të energjisë, të shërbimeve, të taksave, të tarifave”.
Ajo bëri edhe krahasimin e situatës politike midis Shqipërisë dhe Serbisë për shkak të protestave të vazhdueshme në të dy vendet përkatë. “Vuçiç u tregua më i zgjuar se Edi Rama dhe më i shpejtë se ai, pasi i pranoi dhe i shpalli zgjedhjet e parakohshme, ftoj Edi Ramën që të bëjë të njëjtën gjë”.
