Nga Julian Hoxhaj
Varfëri dhe skamje, ferra dhe shkurre, tjegulla dhe binarë të thyer, mure të plasaritur dhe një nënë kryefamiljare me dy fëmijë, pa bashkëshort prej 13 vjetësh, jeton në këtë ambjent, që duhet të ishte një shtëpi, por që vetëm e tillë nuk është.
Historinë e Merita Beqirit, në fshatin Pekisht të Peqinit, është pak ta quash dramatike. 13 vjet më parë, bashkëshorti i saj u largua në drejtim të Greqisë, duke lënë pas bashkëshorten dhe dy fëmijë, një vajzë dhe një djalë të mitur.
Prej asaj dite ai nuk do të kthehej më… Qysh atëherë nis dhe kalvari i vuajtjeve të Merita Beqirit, e gjendur në mes të katër rrugëve, përballet me skamjen e tejskajshme. Pa punë dhe me fëmijë ende të mitur, Merita Beqiri duhet të shohë tashmë edhe rrënimin e shtëpisë, e cila dita-ditës duket sikur paralajmëron një tragjedi të rëndë.
Skamja dhe varfëria kanë bërë që fëmijët të braktisin shkollën, pa libra dhe në pamundësi ekonomike, vajza dhe djali i Meritës, janë detyruar të mos shkojnë në shkollë. Kjo histori dramatike, u publikua pak ditë më parë në media, duke tërhequr vëmendjen e nismës së bamirësisë “Dhuro Dashuri”.
Aktivist të saj, kryesisht gazetarë nga qyteti i Elbasanit, mesditën e kësaj të enjte, shkuan pranë familjes Beqiri, për të dhuruar disa ndihma ushqimore, me produktet bazë të jetesës.
Veç varfërisë së skajshme dhe mungesës së shpresës, kjo familje ka nevojë të menjëhershme për një strehë, pasi banesa aktuale rrezikon shembjen nga çasti në çast.
