Ish-zytarë të policisë, kolegë dhe miq të komisarit Artan Cuku kanë mbërritur në Drejtorinë e Policisë së Tiranës ku kanë nisur homazhet në nderim të tij.
Policia njoftoi se në kuadër të realizimit të ceremonisë së lamtumirës të ish-punonjësit të Policisë së Shtetit, Z. Artan Cuku, ish-drejtues i lartë i strukturave policore në nivel vendor, i cili u nda nga jeta më datë 08.04.2017, nga Drejtoria e Policisë së Shtetit, do të organizohen homazhet ditën e sotme 09.04.2017, nga ora 12:00-13:30, tek Drejtoria Vendore e Policisë Tiranë.
Ish-drejtori i policisë, aktualisht deputeti i Partisë Socialiste, Pjerin Ndreu i shprehu ngushëllimet familjes Cuku.
Kreu i opozitës, Lulzim Basha e cilëson të ndjerin si oficerin me rezultate të larta në punën e tij për të luftuar krimin në vitet të vështira për vendin.
Gent Strazimiri, ish-zv/Ministër i Brendshëm e quan të padrejtë lirimin e tij nga detyra, duke thënë se në fakt policia e shtetit duhet të kishte imazhin tënd.
Artan Cuku, ish-kryepolic në policinë e Vlorës u ekzekutua dje në pritë pranë banesës së tij në Tiranë, te “Rruga e Kosovarëve”.
