Ndërkohë që studentët po protestojnë para Ministrisë së Arsimit dhe Lindita Nikolla nuk del të takohet me ta, kreu i qeverisë ka një përgjigjie. Ai pyet shqiptarët nëse janë gati të paguajnë taksa për ngelësit.
“Më falni, po e para ministrja s’është as pa shkollë as me UFO, ndryshe nga çfarë ju mund të keni mesuar nëpër kazanët mediatikë, ndërkohë që pyetja ime është: A jeni ju dakord që t’i paguani ju, pra taksapaguesit, shpenzimet e universitetit për studentët ngelës? Unë për vete nuk jam dakord e para dhe e dyta, nuk ka asnjë rritje tarifash qysh prej vitit 2014 (dhe tarifat nuk i vendos ministrja, po vetë universiteti sa për dijeni, quhet autonomi universitare), po ka zhurmë kazanesh, dizinformim me dashje apo llaf pas llafi, si edhe këmbëngulje nga një pakicë për të mos pranuar zbatimin e reformës që e nxjerr universitetin nga bataku shumëvjeçar. Sa për fotot, unë nuk kam ndërmend t’i lë, po ju mund të mos hyni këtu dhe kështu shpëtoni edhe nga fotot”, ka thënë Rama.
Kryeministri i ka kthyer përgjigje një komentuesi i cili i kishte shkruar “Lëri fotot zoti Rama po shiko dhe zgjidh hallin e studentëve se kanë bërë kaps Tiranën, mos mbaj ministra mediokër e pa shkollë ose me shkollë UFO”.
