“Presidenti i Republikës ju akordon titullin “Nderi i Kombit” dy trevave që e kanë la me gjak çdo faqe të historisë së këtij vend në luftë me turk, shka e karadak”
Nga Ndoc Mulaj
Përpjekjet shekullore për qendresë, liri e pavarësi, arsim e kulturë u kurorëzuan sot në Pallatin e Kulturës “Dardania” me titullin më të lartë “Nderi i Kombit” për Krahinën e Nikaj-Merturit dhe Geghysenit!
Salla e Pallatit të Kulturës, ishte mbushur plot e përplot me nikajmerturas e geghysenas, sepse bash sot ishte dita e tyre, dita më e shënuar e të gjitha epokave ngulimtare në këto troje. Ashtu si edhe ne festën e shkollës së Gjonpepjave, mungonin e ardhmja, pra nxënësit, mungonin mësuesit, doktorët dhe punonjësit e tjerë të administratës. Një doktor “rebel”, kur i drejtova aparatin me tha “Mos pash Zotën se me ditë që jam këtu, më largojnë nga puna”, e kjo për mua e ka emrin vetëm diktaturë?!
Por ajo që më bëri më shumë përshtypje ishte mungesa totale e mediave në këtë eveniment kaq të rëndësishëm. Presidenti i Republikës ju akordon titullin “Nderi i Kombit” dy trevave që e kanë la me gjak çdo faqe të historisë së këtij vend në luftë me turk, shka e karadak, e aty nuk është i pranishëm asnjë tv, e me sa vura re as ai lokal. Turp për to! Gjithsesi festarëve ju shkëlqenin sytë nga gëzimi dhe ndjeheshin me të çliruar e më të çiltër pa këto çakalla të politikës nëpër këmbë se nuk po them “mbeturina”. Pas hymnit të flamurit dhe në mes shumë duartrokitjeve, kryetari i Bashkisë së Tropojës, Besnik Dushaj ka hapur këtë eveniment festiv duke evidentuar momentet më kyqe të historisë së dy krahinave në fjalë, e duke falenderuar e përshëndetur Presidentin e Republikës dhe të pranishmit në sallë. Pas dhënjes së titujve nga këshilltari i Presidentit të Republikës Shaqir Hasanaj dhe pas fjalëve përshendetëse e falenderuese të Admistratorit të Nikaj-Mërturit Gjevalin Gjeloshaj e dy kryepleqëve të Geghysenit, festa vijoj me këngë e valle. Bardhok Perbibaj, Arlen Qelia e Agron Hoxha, Prekë Mrishaj dhe grupi i valleve të Tropojës shkundën edhe një herë Pallatin e Kulturës Dardania. Por ai që ja dridhi themelet ishte ish drejtori i këtij pallati për shumë vite me rradhë , legjenda e skenave dhe festivaleve Marash Mhilli. Jehona e zërit të tij, jo vetëm që ngriti peshë me dhjetra herë zemrat e të pranishëmve por buçiti aq fort sa u ndie deri në Majen e Hekurave.
Prej Majes së Shkëlezenit e deri në Qafë të Agrit, nuk ka pllamë toke që nuk e meriton titullin “Nderi i Kombit”
Sot, Shkalla e Grisë, Qafa e Kolçit, Kodrat e Palçit e deri te Rozafa e pat emrin Bujar Nishani e pastë faqen e bardhë.
Dosja ime dhe e djalit të Geghysenit Hysni Osmani, mbase edhe ishin arkivuar e prisnin të mbulohen nga pluhuri i harresës sikur të mos kishte qenë njëri nga djemt më të mirë që ka nxjerrë Tropoja ndër breza, Isuf Ҫelaj. Pra, është ai që i lëvizi, ua shkundi pluhurin, e i çoi në dorën e duhur. Edhe pse ai dhe të tjerët sot u treguan më shumë se modest, unë si i Merturas nuk mund të jem aq i pasoj e mos ta falenderoj. Tu rritë fort ndera Isuf Ҫelaj dhe jam i bindur që Nikaj-Mërturi e Geghyseni nuk do ta harrojnë kurrë gëzimin që ju dhe sot e në përjetësi!
