Gazetarja Klodiana Lala, duke folur për ngjarjen e ndodhur para pak ditësh në Komisariatin nr.5 në Kamzë, e ka cilësuar skandaloze vdekjen e Arben Micit në qeli. Lala tha se fillimisht një personi në paraburgim nuk mund t’i lejohet një mjet ndezës, ndërsa pohoi gjithashtu se një person me masë sigurie, nuk mund të qëndronte në ambientet e komisariatit.
“Nuk lejohet që një i paraburgosur të pi cigare, sepse në momentin që hyn aty ka një portokall. Duhen hequr rripat, lidhëset e këpucëve e madje edhe kopsat që mund të jenë të rrezikshme. Ngjarja është shënuar në 20:30 të mbrëmjes. Mici është vendosur në orën 13:00 në ambientet e izolimit. Në qelinë tjetër ka qenë Dilaver Idrizi që kishte marr në masën me burg. Shkelja është që këta nuk duhej të qëndronin në komisariat, por të vendoseshin në ambientet e paraburgimit” – është shprehur Lala.
Lala gjithashtu u shpreh se për disa pllaka porcelani të shtruara gabim dhe disa zgara hekuri në dritare, Mici nuk mundi të shkonte në ambientet e paraburgimit, ku duhej të mbahej, por qëndronte në komisariat.
“Është një ngjarje që ka ndodhur në një ambient të mbyllur të izolimit që janë nëntokë. Ambienti është pa dritare. Ka pasur një raport të Avokatit të Popullit që në mars 2021 ka rekomanduar mbylljen urgjente të këtyre qelive dhe të kaloheshin në ambientet e reja. Skandali është që në qelitë e tjera të ndërtuara, shteti shqiptar nuk ka bërë zagarët dhe nuk është hapur një tender apo nuk është bërë një procedurë dhe e dyta tualetet e qelive të reja janë prej porcelani, gjë që nuk lejohet sepse porcelani mund të thyhet dhe të kryhen akte vetvrasjeje” – u shpreh Lala.
