Kreu Shtylla Nga “… nuk do të marrë kokërr leku!”, ministrja e Edi Ramës...

Nga “… nuk do të marrë kokërr leku!”, ministrja e Edi Ramës e pranon: Do ia paguajmë 110 milionë euro Becchetti-t

0
182

Qeveria shqiptare do të paguajë mbi 263 milionë euro për gjyqe të humbura në arbitrazh, nga të cilat 110 milionë euro i takojnë sipërmarrësit Francesco Becchetti.

Në një intervistë me gazetarin Lutfi Dervishi në emisionin “Përballë”, ministrja e Financave, Anila Denaj tha që detyrimet ndaj Becchetti-t do të shlyhen, kur vendimi të jetë i formës së prerë.

“Ne patjetër që do ta paguajmë. Hyn edhe në negociata. Po në rastin e Becchetti-t, ne jemi në pritje të përgjigjes nga Avokatura e Shtetit. Ne nuk mundemi dhe juridikisht të buxhetojmë procesin, në qoftë se Avokatura e Shtetit nuk thotë: “Tani ky vendim duhet zbatuar”. Ka procese dhe ka kontrata që nëse do të negocioheshin në kohë mund të kishin kompensuar dhe dëmin e fitimit të gjyqit. Dhe sa më shumë ta lëmë në kohë, jemi duke shtyrë një proces që nuk është në të mirë të shqiptarëve. Nuk po flas për rastin konkret këtu. Por në momentin që procedurat finalizohen atëherë janë detyruese për buxhetin e shtetit. Dhe ata kanë vëmendjen për t’u paguar proporcionalisht sipas fondeve. Nëse vjen e formës së prerë do të duhet të hiqet një fond nga një proces tjetër.”,- tha Denaj.

Ministrja shtoi se qeveria ka arritur një marrëveshje, e cila i lejon pagesën me këste të një prej këtyre faturave.