Banorët e Laprakës dhe Paskuqanit e kanë zhvendosur protestën e tyre në Kadastër, pasi nuk morën asnjë përgjigje në ARRSH, banorët e Laprakës dhe Paskuqanit po protestojnë para ambienteve të Kadastrës ku dyert janë të mbyllura për ta. Një nga banorët tha për mediat se po kryhen devijime dhe se projekti që po ekzekutohet në terren nuk ka lidhje me atë fillestar, duke shtuar se edhe deklarata e vetë ministres bie ndesh me atë çfarë po ndodh vërtetë në zonën e tyre.
Ai shprehet se ka marrë lejen e legalizimin që në vitin 2005 dhe sot nuk merret parasysh një gjë e tillë, duke theksuar se me leje janë pajisur ata persona që kanë paguar mijëra euro. “Kemi 4 -5 muaj kështu. Erdhëm në ARRSH për të marrë një përgjigje se e kanë devijuar projektin. Edhe vetë ministrja ka thënë se po ekzekutohet vendimi për projektin që ka qenë por në fakt është krejt e kundërta. Janë lënë toka të lira dhe 60 familje do preken tani, që nuk ishin pjesë e projektit fillestar. Kanë paguar lekë për këto spostime. Që në 2005 kam dorëzuar legalizimin e shtëpisë, dhe tani na vijnë me përgjigje negative. Legalizim kanë bërë ata që kanë paguar nga 5 mijë euro dhe 10 mijë euro”, tha një nga banorët.
Ndonëse ata protestojnë prej muajsh, institucionet përgjegjëse nuk bëjnë asnjë reagim, por IKMT vazhdon shembjet.
