Nga Sokol Shameti
Sa kohë muzika e një artisti (të angazhuar politikisht apo jo) konsumohet në internet ose në radio, bëhet fjalë thjesht për një mall të cilit ti i merr aq sa të ofron në distancën e vet nga procesi prodhues – tingullin, harmoninë, tekstin, videon etj.
Është një produkt tregtar të cilin ti e paguan indirekt përmes reklamave që i ndërfuten videos që ti sheh, përmes çmimit të internetit që të vjen me faturë mujore a përmes taksave që shpërndahen hipotetikisht edhe për mirëmbajtjen e mjedisit të medias elektronike që ne po konsumojmë.
Në këtë rast, ty nuk të intereson çfarë ka qenë duke bërë a duke menduar prodhuesi i këtij produkti gjatë kohës kur ka prodhuar këtë këngë, apo tani në momentin kur ti je duke e konsumuar produktin e tij. Ti thjesht zgjedh ta blesh apo mos ta blesh produktin artistik të kthyer në mall.
Kjo është ajo që ndodh në kapitalizëm, me komodifikimin dhe tregtarizimin e gjithçkaje të tregtueshme e madje edhe të atyre të paimagjinueshme se mund të ishin të tregtueshme.
Mirëpo, kur ty të ofrohet të paguash jo vetëm për produktin e këngëtarit – këngët e tij – por edhe për kënaqësinë e të asistuarit drejtpërdrejt në procesin e tij prodhues (që është të kënduarit), atëherë ty po të ofrohet të blesh bashkë me këngën edhe këngëtarin me gjithçka ai përfaqëson.
Kjo ofertë bëhet njëlloj siç bëhet çdo ofertë tregtare në kushtet e neoliberalizmit: me premisën se ti ke nevojë për të, por pa u interesuar nëse ti ke vërtet nevojë për të. Ty thjesht ajo të ofrohet dhe pastaj ti i nënshtrohesh marketingut që synon të të bindë sa i mirë dhe i nevojshëm është për ty ky mall shtesë që po të shitet.
Në këto kushte, është e përligjur që ti ashtu si për çdo mall tjetër, ti të interesohesh se çka është kjo gjë që po duan të të bindin se ti duhet ta blesh me çmim kënaqësie. Sidomos nëse edhe po duan të ta shesin më shtrenjtë se çmimi “i tregut”.
Se nqs fjala vjen, po duan të të bindin se ti ndjen kënaqësi jo thjesht nga këngët romantike të një këngëtari nazist, por edhe nga vetë nazizmi që këngëtari promovon sa herë që nuk është duke kënduar, atëherë ty thjesht po mundohen të të trafikojnë tok me çmimin me të cilin ti je gati të blesh një këngë, edhe një tarifë shtesë.
Një çmim me të cilin ti do paguash financimin e ideologjisë naziste të këngëtarit nazist të shkëputur nga kënga jo-naziste të cilën ti do mund ta dëgjoje edhe me çmim të ulët nga interneti.
