Vijojnë hetimet nga policia e Tiranës për shpërthimin që ndodhi një javë më parë në rrugën “Margarita Tutulani” në kryeqytet. Një sasi eksplozivi rreth 500 gram C4 u vendos në katin e pestë të një pallati 13-katësh që ndodhej pranë banesës së ish-drejtorit të postës në Dibër, Naim Kaçorri. Si pasojë e shpërthimit kishte dëme të shumta materiale, kryesisht nga kati i tretë në atë të shtatë, por fatmirësisht jo të dëmtuar në njërëz.
Ditën e djeshme policia bëri të ditur për GSH se autori është ende i paidentifikuar. Sipas hetimeve dyshohet se objektivi është ngatërruar sepse rezulton që familja Kaçorri nuk ka pasur konflikte me ndonjë person.
Hetimi për familjen Kaçorri ka nisur mbi faktin se kryefamiljari ka qenë ish-drejori i Postës në Dibër ndërsa bashkëshortja e tij mjeke. Gjithashtu hetimet kanë vijuar dhe për djalin e tyre që jeton në Spanjë, por ka rezultuar që ky person nuk ka pasur probleme në atë vend. Nën hetuesi janë marrë edhe persona të tjërë të këtij pallati dhe dy djem nga Fieri, që jetonin me qera në po të njëjtin pallat. Ka rezultuar se edhe ata nuk ishin objektiv i atentatit.
