Kryeministri Edi Rama ka thirrur një miting në një kohë krizash e të pazakontë. Por ajo që vihet re është se ky vendim është si një tentativë e Ramës për të treguar forcat me Berishën, i cili në datën 7 Korrik mbajti një protestë të jashtëzakonshme për nga pjesëmarrja.
Konkurrenca mes dy partive ka harruar krizën ekonomike në të cilën ndodhet vendi, ku çmimet në të gjitha sektorët janë rritur dhe jetesa për qytetarët Shqiptarë është bërë më e vështirë.
Megjithatë Kryeministri Rama gjen kohën të merret me koncerte. Ai ka njoftuar se në mitingun që socialistët kanë organizuar në 28 Korrik në Tiranë, do të jetë e pranishme dhe këngëtarja Xhensila Myrtezaj.
Në një postim në rrjetet sociale, Rama shkruan se koncerti do të mbahet për dy ngjarje speciale, e para ajo e 100 vjetorit të marrëdhënieve mes Shqipërisë dhe SHBA, dhe e dyta çelja e negociatave të anëtarësimit për në BE.
“Xhensila do të jetë në shesh! Bashkë në 28 Korrik, me super koncertin në sheshin Skënderbej, për dy ngjarje speciale: 100-vjetorin e lidhjes sonë me SHBA dhe lidhjen me Bashkimin Evropian 100 vjet më pas”, shkruan Rama në postimin e tij në rrjetet sociale.
