Autoritetet policore italiane të Palermos kanë arrestuar në komunën Cefalu, një të shumëkërkuar shqiptar, i cili ishte “zhdukur” që prej vitit 2000. Ndaj tij, Gjykata e Tiranës, kishte lëshuar një urdhër kërkimi ndërkombëtar pasi është dënuar me 25 vjet heqje lirie me akuzën e vrasjes e armëmbajtjes pa leje.
Besnik Lamçja, i arrestuari në Itali, akuzohet për vrasjen tek “Magazinat” e rrugës “Siri Kodra” pasi gjatë një grabitje me armë në Shqipëri ai ka vrarë me armë zjarri një person. Hetimet zbardhën se ai fshihej prej fillim viteve 2000 në Itali nën emër të rremë, duke qëndruar me disa familjarë të tij.
Lamçja është dënuar me 25 vjet burgim, nga Gjykata e Rrethit Gjyqësor Tiranë, për veprat penale “Vrasja me paramendim, kryer në bashkëpunim” dhe “Vjedhja me armë”.
