Arrestohet në Mal të Zi Viktor Marku, i dyshuar për vrasjen e Hekuran Billës. Gazetari Artan Hoxha bën me dije se Marku është arrestuar në afërsi të Podgoricës, teksa ishte në kërkim policor si autor i dyshuar për vrasjen e Billës në Tiranë.
Arrestimi i tij është bërë në bashkëpunim mes Policisë së Shtetit dhe policisë malazeze. Bëhet e ditur se policia ka ndjekur lëvizjet e Viktor Markut, më pas ka njoftuar homologët malazezë të cilët kanë kryer arrestimin.
Kujtojmë se Billa u vra teksa po lëvizte me makinë, ku disa persona që i bënë pritë me dy automjete e qëlluan me 11 plumba duke e lënë të vdekur në vend.
Pista kryesore e hetimit është pikërisht hasmëria, për shkak se në vitin 2006 Billa kishte vrarë në Londër Prel Markun, asokohe 22-vjeç, ndërsa në kërkim si autor i dyshuar për këtë ngjarje është pikërisht vëllai i këtij të fundit Viktor Marku, i cili tashmë është vënë në prangat e policisë.
