Ish-kryeministri Sali Berisha ka deklaruar sot se shqiptarët janë në rrezik, pasi niveli i shpopullimit po rritet çdo vit e më shumë. Madje ai tha se jemi vendi i 10 në botë për nivelin më të lartë të qytetarëve që largohen. Berisha theksoi se një komb që shpërbëhet nuk zhvillohet ekonomikisht, përkundrazi bie ekonomikisht, bie kulturalisht dhe se ne sot jemi një komb në këtë situatë. Ai tha se të dhënat zyrtare tregojnë që në 7 vite kanë ikur mbi 740 mijë qytetarë dhe pjesa më e madhe janë të rinj.
“Sot në çdo këndvështrim që të shohim këtë vend dhe këtë komb, jemi në rrezik të madh. U them se ndoshta për herë të parë në tërë ekzistencën tonë, ne renditemi në 10 vendet që braktisen më shumë nga qytetarët e vet. Ndoshta për herë të parë në historinë tonë kombëtare në 7 vite, janë larguar nga Shqipëria 744 mijë e 714 qytetarë, më shumë se 25%.
Janë larguar nga Shqipëria më shumë se sa u larguan grekë pas luftës civile, pas Luftës së Dytë Botërore. Emigracioni shqiptar në Europë tejkalonte edhe atë sirian, një vend që ishte në luftë të madhe. Një komb që ikën, është një komb në rrezik ekzistencial. Një komb që shpërbëhet nuk zhvillohet ekonomikisht, përkundrazi bie ekonomikisht, bie kulturalisht. Ne jemi sot një komb në këtë situatë”, shprehet Berisha.
