Ministrja e Arsimit Evis Kushi ka folur me detaje për sistemin arsimor si dhe për ndryshimet e reja që do të përfshijnë shkollat 9-vjeçare nga shtatori. E ftuar në rubrikën “Opinion” në News 24, Kushi tregoi dhe për ndryshimet që do të ketë këtë vit matura shtetërore.
“Matura shtetërorë është proces i gjatë më disa etapa, ne po përpiqemi që të marrim të gjitha masat që mos ndodhin problematika si rasti i Turit apo problematika të tjera. Në të gjitha gjimnazet e vendit në këtë periudhë po bëhet një punë intensive në asistimin e maturantëve dhe përgatitjes së tyre. Hartimi i testit është moment kur vëmendja jonë është maksimale. Këtë vit do jetë ndryshe, jo i parapërgatitur kohë më parë, por ditët e fundit një grup mësuesish me eksperiencë do të mblidhen dhe do hartojnë në grup në mënyrë që të kemi test që i përmbahet programi”, tha Kushi.
Ajo po ashtu u ndal tek mësuesit ku u shpreh se për të lehtësuar mësuesit nga disa procedura në përgatitje dokumentacionesh, vendosën për një model të ri. Mësuesi do të jetë më i fokusuar në punën e drejtpërdrejtë me nxënësit, duke eliminuar fletore.
“ Fletorja nuk do të thotë që nuk i vlen mësuesit, se do të mbajë shënime. Dua të mos interpretohet sikur mësuesi nuk do të ketë më shumë punë, por kjo punë do jetë më shumë e fokusuar tek nxënësit ndërkohë që parimet bazë të vlerësimit mbeten po ato”, deklaroi ajo.
