Kryeministri Edi Rama ka reaguar lidhur me zjarrin që shkrumboi pallatin 12-katësh në kompleksin “Arlis” pranë QSUT. Me anë të një postimi në rrjetin social “X”, Rama shprehet shumë kontradiktor kur thekson se pallati që u dogj dje, pavarësisht se nuk lidhet me ndërtimin, do të rindërtohet 100% nga vetë ndërtuesi.
Po si mundet një kompani ndërtimi të rindërtojë edhe një herë objektin, nëse nuk është fajtore për shkaqet që sollën atë katastrofë në Tiranë. Këtë e vendos ligji dhe jo Maliqi, sikurse po tregohet në rastin konkret Rama.
Ose Rama kërkon të fshehë pikërisht atë që tashmë po flitet, punimet e dobta dhe materialet e lira që krijuan ata tragjedi për dhjetrë familje në kryeqytet.
Por pas këtyre punimeve nuk qëndrojnë vetëm ndërtuesit, por edhe shteti, i cili edhe ka dhënë miratimin pas përfundimit të objektit. Pra këtu të bëjmë me një dy bashkëfajtorë, firmën ndërtuese që kërkon të përfitojë sa më shumë, pavarësisht se rrezikohet jeta e qytetarëve dhe shteti që mbyll sytë përballë këtyre shkeljeve të rënda.
“Pallati që u dogj dje në Tiranë, do të rindërtohet 100% nga vetë ndërtuesi, pavarësisht se nga të dhënat paraprake shkaku i zjarrit s’ka asnjë lidhje me vetë ndërtimin! Sepse ne nuk mund t’i lemë vetëm njerëzit e dëmtuar në pronën e tyre dhe nga ana tjetër, taksapaguesit nuk mund të paguajnë një dëm të cilin duhet ta paguanin sigurimet – rast kuptimplotë për të kuptuar të gjithë se sigurimi i shtëpisë nga fatkeqësitë është i domosdoshëm. Gjithësesi, të gjithë familjarëve të dëmtuar u them të ndjehen të qetë nga kjo anë dhe iu uroj vetëm shëndet, duke falenderuar nga zemra zjarrfikësit e forcat e rendit për punën heroike në shpëtimin e të gjitha jetëve të rrezikuara”,– shkruan Rama në X.
Po kush është Armand Lilo?
Armand Lilo, i njohur ndryshe edhe si njeriu i kateve pa leje, është klienti i besuar i Edi Ramës.
Ai ka përfituar leje ndërtimi në kryeqytet, ndërsa kompania e këtij të fundit ka përfunduar edhe në dyert e Gjykatës për ndërtim të paligjshëm.
Lilo me firmën e Ramës ka pushtuar hapsira të konsiderueshme në Tiranë, që nga kullat në qendër të kryeqytetit, te Liqeni Artificial, te Rruga e Kosovarëve, etj.
Ajo që po ndodh me ndërtimet e “Arlis” SHPK të Armand Lilos, nuk mund të fshihet më pas justifikimeve apo deklaratave boshe. Këtu nuk kemi të bëjmë me një incident të izoluar, por me një zinxhir ngjarjesh të rënda që tregojnë qartë një problem të thellë me standardet dhe sigurinë. Te “Farmacia 10” një kompleks i tërë përfshihet nga flakët, zjarri përhapet me shpejtësi në fasadë, digjen shkallë të tëra, mbi 30 apartamente preken, njerëz bllokohen në tym dhe nxirren nga ballkonet në panik – kjo është tablo katastrofike për çdo qytet normal. Dhe më e rëndë akoma: nuk është hera e parë. I njëjti kompleks është përfshirë nga zjarri edhe në 2021 gjatë ndërtimit.
Pra kronologjia është e qartë dhe e frikshme: zjarr në 2021, skela që bien dhe plagosin qytetarë në 2024 me emra konkretë dhe përgjegjësi të konstatuara, dhe sot një tjetër zjarr që rrezikon jetën e dhjetëra familjeve. Sa prova duhen që të kuptohet se këtu kemi një model të përsëritur dhe jo rastësi?
Pyetja që kërkon përgjigje është e drejtpërdrejtë: kush e mbron Armand Lilon dhe “Arlis Ndërtim”? Si është e mundur që pas gjithë këtyre ngjarjeve me emra, data dhe pasoja konkrete, nuk ka përgjegjësi reale? Ku janë institucionet që duhet të mbrojnë qytetarët?
