Ndërron jetë një pacient i shtruar tek Infektivi, që ishte prekur nga koronavirusi. Mësohet se ai ka ndërruar jetë pasditen e sotme, ndërsa vuante edhe nga sëmundje të tjera shoqëruese.
69-vjeçari është infektuar në spitalin e Shkodrës nga Infermierja dhe u soll në Tiranë bashkë me disa pacientë të tjerë që ishin infektuar në të njëjtën mënyrë disa ditë më parë.
Ky është shkodrani i pestë i infektuar që ndërron jetë në spital. Ministria e Shëndetësisë, sqaroi se 69-vjeçari ishte i prekur nga COVID19, por vdekja e tij ka ardhur si pasojë e sëmundjeve shoqëruese.
Njoftimi i plotë
Pacienti 69-vjeçar nga Shkodra që ka ndërruar jetë në spitalin infektiv, ka humbur jetën si pasojë e sëmundjes hemoragjisë cerebrale (aksidentit vascular hemoragjik).
69-vjeçari ishte prej 13 vitesh me tumor në kokë dhe kishte kryer 3 ndërhyrje. Kishte hemorragji cerebrale dhe ishte në gjendje të rëndë në koma.
Sipas spitalit infektiv, 69-vjeçari nuk ka ndërruar jetë si pasojë e COVID-19, pasi ishte bartës i virusit, por pa shenja të sëmundjes, (asimptomatik) dhe ka ndërruar jetë si pasojë e hemoragjisë cerebrale.
Ministria e Shëndetësisë i shpreh ngushëllime familjes së të ndjerit dhe informon se do të mbajë të informuar publikun për çdo zhvillim, ndaj lutemi t’i referoheni njoftimeve zyrtare.
