Presidenti Ilir Meta ka reaguar për skandalin e audiopërgjimit ku dëgjohej Erion Veliaj të shantazhojë më fjalor rruge anëtarët e Tiranës për të votuar kundër Armand Dukës për kreun e FSHF.
Meta i konsideron si të papranueshme ndërhyrjet e politikës në zgjedhjet e FSHF, në një organ që duhet të jetë i pavarur, dhe që sipas tij, këto ndërhyrje nuk po ndodhin për herë të parë.
“Të papranueshme dhe të dënueshme tentativat brutale të politikës, jo për herë të parë, për të ndërhyrë me presion dhe shantazh në zgjedhjet e @FSHF org i cili duhet të jetë i lirë, paqësor, i pavarur, transparent dhe me integritet”, shkruan Meta.
Zgjedhjet për kreun e Federatës Shqiptare të Futbollit kanë nisur një luftë të vërtetë mes kryebashkiakut të Tiranës, Erion Veliajt dhe Armand Dukës, kandidat për të fituar mandatin e 6-të në postin e kreut të FSHF-së.
