Perfundon te 12-ta numri i fitoreve rresht të Barcelonës në Primera Division, pasi janë ndalur më në fund me një barazim 2-2 nga Vijareal. Mungoi Mesi në “apel”, por edhe Suarez, megjithatë një përmbysje nga 0-2 në avantazh në 2-2 është shumë për skuadrën e Luiz Enrikes. Në pjesën e dytë, “Nëndetësja e Verdhë” tregoi një personalitet për t’u përshëndetur, që pak skuadra e kanë bërë ndaj Barcelonës gjatë këtij edicioni, madje në të gjitha kompeticionet. Gjithsesi edhe kjo pikë ishte shumë e vlefshme për kampionët e Spanjës dhe fituesit e Champions League, pasi tashmë janë 9 pikë larg Atletikos së vendit të dytë (madrilenët u mundën dje në Gihon 2-1), kur kanë mbetur edhe 8 ndeshje për t’u luajtur. Por ishte njëkohësisht një pikë e vlefshme edhe për Vijareal, pasi është pozicionuar mirë në vendin e katërt, që i garanton një vend në Champions për sezonin e ardhshëm, me +6 pikë nga Selta Vigo dhe Sevilja, që renditen në vendin e pestë dhe të gjashtë.
