Policia e Shtetit ka bërë të ditur të dhëna zyrtare lidhur me operacionin në Portin e Durrësit ku u gjetën mijëra litra naftë të dyshuara të kontrabanduara dhe në pranga ranë dy vëllezër që kishin peshkarexhën ku u gjet nafta.
Shërbimet e Policisë kanë ndaluar për kontroll anijen e peshkimit me të cilën lundronin shtetasit e arrestuar, dy vëllezër nga Kavaja. Në pranga ka rënë Shpëtim Canin, 43 vjeç dhe Roland Cani, 41 vjeç, banues në Kavajë. Si rezultat i kontrollit, në bordin e anijes së peshkimit, janë gjetur dhe sekuestruar rreth 25 000 litra naftë.
Ndërkohë që në vijim të planit operacional të koduar “Diesel 2”, janë arrestuar edhe shtetasit A. R., 49 vjeç, banues në Fier dhe N. D., 58 vjeç, banues në Lushnjë. Gjatë kontrollit të ushtruar në autobuzin që drejtonte A. R. dhe ku ishte pasagjer N. D., u gjetën dhe u sekuestruan në cilësinë e provës materiale, 120 shishe dhe 30 litra verë, si dhe 205 kuti me parfume të markave të ndryshëm, mallra të cilët u gjetën pa faturë blerjeje dhe të padeklaruara në doganë.
Materialet i kaluan Prokurorisë, për veprime të mëtejshme, për veprat penale “Kontrabanda me mallra për të cilat paguhet akcizë” dhe “Kontrabanda me mallra të tjera”, kryer në bashkëpunim.
