Juventusi u ndal në javën e 9-të të Serisë A, teksa barazoi 1-1 në transfertë ndaj Leçes.
Pjesa e parë pa një Juventus mjaft kërkues, që gjeti edhe glin me Higuain që në minutën e 15-të, por me VAR gjithçka u anulua. Më tej me Dibalën apo edhe Bernardeskin e Higuainin, “Zonja” kërkoi golin e zhbllokimit, por e para u mbyll me rrjeta të paprekura.
Më tej, që në minutën e 50-të, një penallti u akordua për ekipin e Sarrit, pas një faulli ndaj Pjaniç, të cilën e ekzekutoi saktë Paulo Dibala. Por, vetëm 6 minuta më pas, ishte një prekje e topit me dorë brenda zone nga ana e De Ligt, e për arbitrin nuk kishte dyshime. Penallti për Leçen!
Kapiteni Mankosu goditi saktë nga 11 metra, dhe shifrat u barazuan. Juventusi e kërkoi me çdo kusht golin e dytë, por vendasit u mbrojtën mirë, dhe në fund morën një pikë me shumë vlera, dhe tani e gjejnë veten në vendin e 16-të, me 8 pikë. Ndërkohë, barazimi i dytë këtë kampionat për Juven, që tani mban vendin e parë me 23 pikë, por është Interi që ka mundësi të marrë vendin e parë, nëse fiton takimin e vet.
/Panorama/
