1 500 qytetarë po jetojnë në tendat e ngritura me shpejtësi në Sanliurfa, një nga qytetet e Turqisë të goditur më rëndë nga tërmeti.
Një i mbijetuar tregoi për News sky se ai dhe familja e tij kaluan dy ditë në shi dhe temperatura të ulëta përpara se të vendoseshin në qendrat strehimore.
“Në vendin tim nuk ka mbetur asgjë, vetëm rrënoja. Ne u tmerruam, nuk mund të qëndronim atje. Të gjithë janë shumë të frikësuar”, ka thënë Mahmood.
Nga ana tjetër nipi i Mahmood, teksa mbante në krahë vajzën e tij të vogël, rrëfeu dramën që përjetoi: Vajza vetëm qante, nuk mund të flinte për shkak të ftohtit. Qan gjatë gjithë kohës, temperaturat janë shumë të ulëta”. Ekspertët e kanë vlerësuar situatën si shumë kritike, pasi edhe të mbijetuarit e tërmetit po përballen me të ftohtin.
“Nuk kemi vdekur nga uria apo nga tërmeti, por do të vdesim të ngrirë nga i ftohti”, ka thënë një tjetër.
Turqia dhe Siria u goditën nga një tërmet i fortë që deri më tani ka shkaktuar 12 mijë viktima, mijëra të plagosur dhe shumë të tjerë të bllokuar në rrënoja. Aktualisht dhjetëra mijëra janë strehuar në qendra tregtare, stadiume, xhami e qendra komunitare.
