Ish-administratori i Bankers Petroleum, Leonidha Çobo, ka pezulluar aktivitetin e studios së tij “LC Consulting”, ndërsa është në hetim nga SPAK për dyshime mbi një skemë faturimesh fiktive dhe përfitimesh nga nënkontraktorë të sektorit të naftës. Më 27 prill 2025, Çobo ka shkarkuar administratorin Emirjon Marku dhe ka vendosur pezullimin pa afat të aktivitetit, në një periudhë kur hetimet ndaj tij dhe rrjetit të lidhur me Bankers Petroleum janë intensifikuar nga autoritetet.
Sipas dosjes hetimore, Leonidha Çobo dyshohet se ka përfituar mbi 155 milionë lekë të reja (rreth 1.5 milionë euro) përmes konsulencave të deklaruara si shërbime, të cilat prokuroria i konsideron pjesërisht fiktive. Hetimi, i nisur nga Prokuroria e Fierit dhe i kaluar më pas në SPAK, përfshin transaksione me kompani të lidhura me Bankers Petroleum, përfshirë Tea Co të Artur Çobos me rreth 21 milionë lekë pagesa, si dhe subjekte të tjera të sektorit të hidrokarbureve që kanë vijuar kontratat deri në ndërprerjen e tyre në vitin 2020.
Në listën e klientëve të LC Consulting përfshihen edhe Al. Global Oil me rreth 31 milionë lekë, Europetrol Group me markën Eida, si dhe H2015 shpk në pronësi të Besnik Mustafajt dhe Dardan Mustafajt me rreth 29.5 milionë lekë, ndërsa kompani të huaja si GreenHouse Smart Technology LTD me rreth 1.8 milionë lekë dhe AS Geotechnology me rreth 10 milionë lekë dyshohen se nuk lidhen me shërbimet e deklaruara. SPAK po verifikon nëse këto qarkullime janë përdorur për evazion fiskal, pastrim parash dhe kanalizim të fondeve përmes faturimeve të dyshuara si fiktive.
