Ish-kryetarja e LSI, Monika Kryemadhi është thirrur sot në orën 10.00 në Prokurorinë e Posaçme si personi që ka kallëzuar inceneratorin e Elbasanit. Mësohet se, Kryemadhi përveç se do t’i përgjigjet pyetjeve të prokurorëve, gjithashtu do të dorëzojë prova të reja mbi këtë aferë që ka implikuar zyrtarët të lartë të qeverisë Rama.
Kryemadhi ka depozituar më herët në SPAK dosje me fakte dhe prova për inceneratorin e Elbasanit. Kjo lëvizje e SPAK vjen pak kohë pasi sekretari i përgjithshëm i Këshillit të Ministrave, Ëngjëll Agaçi ishte thërritur në SPAK për të dëshmuar për inceneratorin e Elbasanit. Vetë Kryemadhi në të njëjtën ditë deklaroi se emri i Agaçit lidhet me inceneratorin e Elbasanit për shkak të financimit me vendim qeverie të një kontrate të paligjshme në lidhje me djegësat e plehrave.
Por Kryemadhi shtoi se SPAK nuk ka ende një reagim zyrtar në lidhje me këtë deponim të Sekretarit të Përgjithshëm të KM-së, duke lënë kështu dhe opsionin që mund të jetë thirrur nga organi i akuzës edhe për çështje të tjera.
Kujtojmë se ish ministri Lefter Koka është aktualisht në burg për shkak se rezulton i përfshirë në skandalin me inceneratorin e Elbasanit. Sipas prokurorisë ish ministri ka marrë ryshfet 3.7 mln euro për ndërtimin e tij. Ndaj ish ministrit të Mjedisit rëndojnë tre akuza, ajo e “korrupsionit”, “shpërdorimit të detyrës” dhe ajo e “pastrimit të parave”. Lefter Koka u arrestua më 14 dhjetor me urdhër të SPAK për çështjen e inceneratorit të Elbasanit, ndërsa më pas SPAK kërkoi ndaj tij masë arrest me burg pasi dyshohet si i përfshirë edhe në inceneratorin e Fierit.
