Në ditën e saj të parë të turit ballkanik, përfaqësuesja e lartë e BE-së për politikat e jashtme, Federica Mogherini, është shprehur se vazhdimi i rrugës së reformave është një çështje me rëndësi për qytetarët e Ballkanit dhe jo vetëm për Bashkimin Europian.
Mogherini deklaroi se integrimi i shteteve ballkanike në BE është një detyrë e kësaj gjenerate politike dhe jo e asaj të ardhshme. Ajo theksoi se popujt e Ballkanit janë europianë, dhe si të tillë, meritojnë mbrojtje dhe të drejta të barabarta me çdo qytetar tjetër të këtij kontineti.
“Vendet e rajonit kanë identitete të ndryshme dhe pretendime të ndryshme, e rëndësishme është bashkëpunimi dhe zgjidhja e mosmarrëveshjeve përmes negociatave”, tha Mogherini.
Mogherini do të jetë në Tiranë mbrëmjen e së premtes, menjëherë pas përfundimit të vizitës në Serbi.
