Shefja e Bashkimit Europian për Politikën e Jashtme Federica Mogherini ka deklaruar se BE jo vetëm që nuk do të tkurret, por është duke shikuar me përparësi mundësinë e aderimit të vendeve ballkanike.
E pyetur mbi mundësinë e anëtarësimit të Serbisë, Malit të Zi dhe Kosovës, Mogherini tha për “La Stampa” se situata është përmirësuar.
Brexit sipas saj nuk ka shënuar aspak fundin e unionit, siç besonin shumë skeptikë duke i cilësuar zgjedhjet e fundit në Francë si një nga treguesit e vlefshëm të këtij fakti.
“Pas referendumit për daljen e Britanisë së Madhe nga Bashkimi Europian ishin të shumtë ata që parashikuan se ai votim do të ishte fillimi i fundit, por të gjitha zgjedhjet, jo vetëm në Francë kanë treguar të kundërtën. Natyrisht që ka probleme me të cilat duhet të përballemi, sepse shqetësimi i qytetarëve është real, por europianët kane nisur të kuptojnë se çfarë është realisht në lojë dhe francezët e thanë qartë se mbështesin projektin europian sepse e konsiderojnë pjesë të zgjidhjes”, thotë Mogherini.
