Deputetja e Partisë Demokratike, Jorida Tabaku, zhvilloi mëngjesin e sotëm një takim me rreth 50 biznese gjermane, në një aktivitet të organizuar nga Konrad-Adenauer-Stiftung, ku përfaqësues të sipërmarrjes gjermane po zhvillojnë një vizitë në Shqipëri për të eksploruar mundësitë e investimit.
Në këtë tryezë morën pjesë drejtues dhe figura kyçe të ekonomisë gjermane, përfshirë drejtues nga kompani globale si BMW Group, RWE, Swiss Re, Eurowings dhe Harman International, si dhe përfaqësues të industrisë financiare, energjetike dhe teknologjike.
Gjatë diskutimit, Tabaku ndau me përfaqësuesit e biznesit gjerman jo vetëm potencialin e Shqipërisë, por edhe kufizimet reale të modelit aktual ekonomik, i cili, sipas saj, nuk po prodhon zhvillim të qëndrueshëm dhe nuk po tërheq investime cilësore.
“Shqipëria nuk mund të vazhdojë me këtë model ekonomik. Duhet të kalojmë drejt një modeli tjetër – një modeli që prodhon vlerë, që mbështet industrinë dhe që tërheq investime produktive, të cilat sot mungojnë,” u shpreh ajo.
Deputetja e PD theksoi se rruga e vetme strategjike për vendin mbetet integrimi në Bashkimi Evropian, por nënvizoi se integrimi nuk mund të vijë në kushtet e një ekonomie të deformuar nga mungesa e konkurrencës dhe nga orientimi i gabuar i investimeve.
“S’ka integrim europian me një ekonomi që nuk prodhon. S’ka zhvillim me investime që nuk krijojnë vlerë. Shqipëria duhet të tërheqë investime që ndërtojnë industri, që krijojnë punë të mirëpaguar dhe që lidhen me zinxhirët europianë të furnizimit,” theksoi Tabaku.
Në takim ishte gjithashtu një nga figurat më të rëndësishme të industrisë automobilistike europiane, Rainer Feurer, përgjegjës për investimet strategjike në BMW Group dhe për zhvillimet në teknologjitë e reja të baterive, një sektor që sipas Tabakut përfaqëson pikërisht llojin e investimeve që Shqipëria duhet të synojë.
Ajo i ftoi bizneset gjermane të konsiderojnë Shqipërinë si një destinacion për investime afatgjata në sektorë strategjikë si energjia, data centers, industria e përpunimit dhe teknologjitë e avancuara, duke theksuar se vendi ka potencial real për t’u bërë pjesë e zinxhirëve të rinj të furnizimit në Europë.
“Shqipëria ka pozicion strategjik. Por ky potencial nuk shfrytëzohet vetë. Duhet një politikë ekonomike që e mbështet dhe nuk e pengon,” u shpreh ajo.
Në të njëjtën kohë, Tabaku vuri në dukje se mungesa e investimeve produktive lidhet drejtpërdrejt me klimën e biznesit dhe me mungesën e sigurisë ligjore.
“Sot kemi më shumë investime që lidhen me pasuri të paluajtshme dhe më pak investime në prodhim dhe industri. Ky është një sinjal që modeli nuk funksionon,” theksoi ajo.
Në takim ishte gjithashtu një nga figurat politike më me ndikim të spektrit konservator gjerman, Joachim Pfeiffer, ish-deputet i Bundestagut dhe zëdhënës për ekonominë dhe energjinë për grupin CDU/CSU.
Në përmbyllje, Tabaku theksoi se Shqipëria ka nevojë për një ndryshim të qartë kursi ekonomik, ku investimet e huaja – veçanërisht ato gjermane – të mos jenë thjesht prezencë, por motor real zhvillimi.
“Ne duhet të kalojmë nga një ekonomi që konsumon, në një ekonomi që prodhon. Nga një ekonomi që shpërblen privilegjin, në një ekonomi që shpërblen punën dhe investimin e ndershëm,” përfundoi ajo.
